ថៃ៖ រដ្ឋមន្ត្រីហិរញ្ញវត្ថុថៃបាននិយាយនៅថ្ងៃចន្ទនេះថា សេដ្ឋកិច្ចរបស់ប្រទេសថៃកំពុងស្ថិតនៅលើផ្លូវដ៏រឹងមាំមួយក្នុងការងើបឡើងវិញ និងបង្ហាញពីភាពធន់ ដែលជាការរួមចំណែកមកពីការប្រមូលពន្ធដារ និងការដំណើរការបានល្អប្រសើរឡើងវិញនៃវិស័យទេសចរណ៍ក្នុងប្រទេស ខណៈដែលលោករំពឹងថាអត្រាអតិផរណានឹងធ្លាក់ចុះមកនៅក្រោម ៣ភាគរយក្នុងឆ្នាំនេះ។
សេដ្ឋកិច្ចនៃប្រទេសធំបំផុតលំដាប់ទីពីរនៅតំបន់អាស៊ីអាគ្នេយ៍មួយនេះ បានពង្រឹងខ្លួនឡើងវិញលឿនជាងគេការរំពឹងទុកនៅក្នុងត្រីមាសទីមួយ នៃឆ្នាំ២០២៣ ដែលផ្អែកសំខាន់បំផុតទៅលើការកើនឡើងនៃវិស័យទេសចរណ៍យ៉ាងឆាប់រហ័ស។ រដ្ឋមន្ត្រីហិរញ្ញវត្ថុថៃ លោក លោក Arkhom Termpittayapaisith បានប្រាប់វេទិកាធនាគារពិភពលោកថា ការស្ទុះងើបឡើងវិញនៃសេដ្ឋកិច្ចថៃដែលរួមចំណែកយ៉ាងច្រើនលើសលុបពីគោលនយោបាយសារពើពន្ធ និងចំណូលផ្សេងៗទៀត ក៏ប៉ុន្តែលោកបានព្រមានថាសកម្មភាពសេដ្ឋកិច្ចទាំងនេះត្រូវតែបន្តអនុវត្តដោយប្រុងប្រយ័ត្ន។
ខណៈដែលមានការព្យាករណ៍ថាអតិផរណានឹងធ្លាក់មកនៅក្រោម ៣ភាគរយនៅឆ្នាំនេះ ដែលការរំពឹងទុកនេះស្ថិតនៅក្នុងគោលដៅរបស់ធនាគារកណ្ដាលដែលបានប៉ាន់ស្មានថាអតិផរណានឹងស្ថិតក្នុងចន្លោះ ១-៣ភាគរយ លោក Arkhom បាននិយាយថា លោកមិនអាចប្រាប់បានទេថាតើនឹងមានការកាត់បន្ថយតម្រូវការសម្រាប់ការដំឡើងអត្រាការប្រាក់ដែរឬទេ។ លោកបានប្រាប់មកកាន់ក្រុមអ្នកសារព័ត៌មាន៖ "គ្រប់មិនទាន់មានភាពច្បាស់លាស់នៅឡើយទេ! ដោយសារបញ្ហាតម្លៃថាមពល និងវិបត្តិពាក់ព័ន្ធនឹងសហរដ្ឋអាមេរិក"។ ការស្ទង់មតិមួយបានបង្ហាញថា ធនាគារកណ្តាលថៃត្រូវបានគេរំពឹងថានឹងដំឡើងអត្រាការប្រាក់គន្លឹះរបស់ខ្លួនម្តងទៀតដល់ ២.០ភាគរយ មុនពេលរក្សាស្ថិរភាពនៃអត្រាការប្រាក់នេះរហូតដល់ឆ្នាំ២០២៤។
សេចក្ដីថ្លែងការណ៍មួយរបស់ក្រសួងហិរញ្ញវត្ថុនៅថ្ងៃចន្ទនេះបានឱ្យដឹងថា សេដ្ឋកិច្ចរបស់ថៃក្នុងខែមេសានេះត្រូវបានគាំទ្រដោយវិស័យទេសចរណ៍កាន់តែរឹងមាំ ផលិតកម្មកសិកម្មកាន់តែខ្ពស់ និងអតិផរណាធ្លាក់ចុះ ខណៈដែលប្រទេសថៃជាទីតាំងល្អក្នុងការទប់ទល់នឹងការប្រែប្រួលជាសកល។ រដ្ឋមន្ត្រីហិរញ្ញវត្ថុក៏បានបញ្ជាក់ថា លោកមានទំនុកចិត្តថាប្រទេសថៃកំពុងឈានទៅរកការស្ទុះងើបឡើងវិញយ៉ាងពេញលេញ ហើយនឹងវិលត្រឡប់ទៅរកសេដ្ឋកិច្ចរស់រវើកវិញក្នុងពេលឆាប់ៗនេះ។
ក្រសួងហិរញ្ញវត្ថុព្យាករថាកំណើនសេដ្ឋកិច្ចនឹងមាន៣,៦ភាគរយនៅឆ្នាំនេះ បន្ទាប់ពីមានកំណើន២,៦ភាគរយកាលពីឆ្នាំមុន។ ធនាគារពិភពលោកនៅក្នុងសេចក្តីថ្លែងការណ៍មួយកាលពីថ្ងៃចន្ទបាននិយាយថា ប្រទេសថៃកំពុងត្រូវការការដោះស្រាយចំពោះតម្រូវការចំណាយដែលកំពុងកើនឡើង ខណៈដែលកំពុងព្យាយាមរក្សាបំណុលសាធារណៈឱ្យស្ថិតក្រោមកម្រិតនៃការគ្រប់គ្រង៕
ព័ត៌មានជាច្រើនទៀតសម្រាប់អ្នក
